Prej 4 ditësh Greqia është në luftë me zjarret, ku gjatë ditës së djeshme u raportua për 18 trupa të pajetë, të cilët u gjetën në zona pyjore të Greqisë veriore.
Sipas raportimeve dyshohet se personat që kanë humbur jetën janë emigrantë.
Rajoni i Evros në Greqinë verilindore, jo shumë larg kufirit turk, është shkatërruar nga zjarret. Ndërkohë një spital në qytetin e Aleksandoupolis u desh të evakuohej.
Në perëndim të Athinës, disa magazina u përfshinë nga flakët në një zonë industriale në Aspropyrgos dhe afër autostradës Attica, qielli u errësua nga tymi.
Dy punëtorë shqiptarë i thanë BBC-së se nëse helikopterët do të kishin mbërritur në kohë do të kishin mundur të shuanin zjarrin.
Rreth mesditës së martës një zjarr i dytë i madh ka rënë në krahun e kundërt të autostradës në fshatin Fyli. Gjysmë ore më vonë banorët morën një mesazh në celular nga numri i urgjencës 112, ku njoftohen për evakuim të zonës.
